fbpx

ما بيربى ولد ليفنى جسد

ما بيربى ولد ليفنى جسد

يوم عن يوم بقدّر قديش الأمومة شي كبير.. قديش الأمومة مو سهلة… قديش فيها تضحيات و صعوبات.. ومو من قليل الجنة تحت أقدام الأمهات

اليومين الماضيين كنت بحالة من التعب لدرجة خلتني مو قدرانة حب حالي لحتى اقدر حب ولادي.. بعرف حكي كتير كبير وأنا لقيته كتيير هيك كمان.. و خجلت من حالي أنا و عم عبرله لزوجي عن هالمشاعر.. انا كنت زعلانة انو هيك حاسة.. بس قلت، يا ترى طبيعي هيك حس ببعض الأيام بمشوار الأمومة؟ معقول تجيني أيام مو قدرانة وفّر الحنان و الحب لأولادي اللي هنن كل حياتي و أغلى ما عندي

تعبانة من كلشي. تعبانة من الركض.. تعبانة من قلة النوم، من قلة الوقت اللي انا نفسي اعمل فيه شو ما انا بدي، من فكرة انو الولاد عم يستفزوني.. من الطبخ اللي كل يوم بدك تفكري شو تطبخي… تعبانة من التعب!

يمكن البعض يستغرب اني عم شارك مشاعر سلبية… لأنو اتعودنا كلشي منشاركه هو الصورة الحلوة بحياتنا.حتى من فترة بالشغل عرضنا فكرة تصوير تعابير وجه مختلفة، و كل ما نقول لحدا انو من بين التعابير بدنا نصوره زعلان. يستغربوا. انو لأ بلا الزعلان…

ليش الزعل أو الاستياء مو مشاعر إنسانية بمر فيها كل حدا فينا؟ ليش مالنا متعودين نشوفها؟ أو نعبر عنها؟

صح انا هيك حاسة وبرجع بقول انو يمكن طبيعي، بس المهم الواحد يعرف كيف يطلَع من هالشعور.. ياخد وقته شوي ليرجع يشحن قدراته، بس الشي اللي بخللينا نقدر نرجع ونتابع مسيرتنا اللي الله سبحانه وتعالى خَصنا فيها لأنو بيعرف انو نحن قدها هو انو نتذكر انو نحن كأمهات أو كأهل كل شي بيملكه ولادنا.. أنو هنن كتير أبرياء ومافي بقلبهم خبث قاصدين يتعبونا أو يجاكرونا.. هنن بدقيقتين رواق معهم بتنسينا كل متاعب الحياة.. بس المهم إنو انضل مذكرين حالنا وحاطين ببالنا انو لازم نرَوّق..
لازم نبعد التوتر عن أنفسنا…

أنا مريت بحالة توتر كتير كبيرة بحياتي من فترة ولجأت لمدربة فن الحياة وَعّتني على شي حلو.. انو الواحد طبيعي تجيه ضغوطات ومواقف توتره، بس لازم نستقبل هالأمور بترحيب .. خلتني أعمل تمرين غمّض فيه عيوني و عيش حالة التوتر اللي دايما كانت اتدايقني، و عوّد حالي استقبلها بصدر رحب وأنا مرتاحة، اتقبلها.. و قاتلي كل ما بتصير معك حطي ببالك انو ما بدك تتوتري

نعَيّش حالنا بفكرة انو أنا ما بدي اتوتر ولا عصّب هو كان حل جدًا ساعدني.. و لهيك كل فترة لازم ذكر حالي لحتى ارجع حب حالي واقدر حب ولادي وأعطيهم أبسط ما بيستحقوه مني كأم مابدهم شي منها إلا وقتها برواااااق

Leave a Reply

Your email address will not be published.