fbpx

موقف أخلاقي و مثال نقتدي به لتربية أولادنا

موقف أخلاقي و مثال نقتدي به لتربية أولادنا


Art Is In Bakery
Ottawa, Canada

05/02/2020

أخدتني اختي على هالقهوة بطلعة رواق قبل السفر و وقفنا بالطابور لحتى نطلب اكلنا. بعد لحظات، بعد ما شرحتلي قديشهم مشهورين بمخبزهم وشغلاتهم الغريبة حكتلي تعي نطلع من الطابور لتقدري تشوفي الأكلات اللي عندهم و تقرري شو بدك تطلبي. و فعلا هاد اللي عملناه لحتى ما ينتظروا اللي ورانا وقت طويل لمّا يصير دورنا.
و بعد ما شفنا وقررنا شو بدنا، رجعنا نوقف بآخر الطابور اللي كان وقتها امتلئ.
.
نحن و واقفين بيجي شب من اللي بيشتغلوا، حامل بإيده كيس فيه كرواسان شوكولا🥐 و بقلنا حدا اشترالكم هي الضيافة لأنو شافكم كيف راح عليكم دوركم بالطابور.
.
😳😳😳😳
بصراحة انا بطلت اعرف عبِّر من قد ما كنت متفاجئة
.
لأنو نحن بإرادتنا قررنا نطلع و نرجع من الطابور يعني جد ما أبدينا اننا اتدايقنا. مين هالحدا الرائع اللي زعل علينا. بس مو هون الروعة. الروعة بالموضوع غير انها لفتة اكثر من جميلة، الروعة انو هالشخص بقي مجهول.
.
يعني أنا لمّا بدي أعمل لفتة مع حدا بحب يعرف مين أنا.
.
نحن متعودين نكون مجهولين لما نعمل صدقة لحتى يكون ثوابها لوجه الله. بس بصراحة مالنا متعودين نعمل هيك اذا بدنا نكون لطيفين مع الناس.

بس هاد المعنى الحقيقي بأن الواحد يعمل شي لوجه الله تعالى.
.
يعني بعرف انو الكنديين معروفين قديشهم شعب لطيف بس هاد يفوق اللطافة… هاد قمة الإخلاص بالعطاء!❤️
.
بشكر هالإنسان او الإنسانة أولا على اللّفتة المذوقة🙏 و الكرواسان الطيبة😋، بس الأهم بشكره/ا انه علمني قديش حلو الواحد يقدم شي بسيط ليفرح غيره من دون مقابل.
.
و هيك كسب دعوة في ظهر الغيب🤲
.
فرحت كتير انو تالية كانت معنا و شهدت هالموقف، و ما صفي حدا ما حكيتله اللي صار معنا و صارت هية اللي بدها تحكي القصة. ركزتلها قديش حلو اللي ساواه هالشخص و قديش فرّحنا بدون ما نعرف مين هو.
.

من أحد واجباتنا بالتربية، اننا نعلّم ولادنا الذوق، واللّطف و العطاء.. بصراحة للأسف كتير مرّات بكون في مواقف من الواجب انو الشخص يكون فيها مذوق معنا بس مابيعمل شي فمنستغرب ومنزعل، متل اذا قدّمتي هدية لحدا، بتتوقعي من الذوق يتشكرك… فما بالك بالمواقف اللي الشخص مو مجبور فيها يكون مذوق، بخلّيكي جد تشوفي قديش هالإنسان أخلاقه عالية.

حكولي اذا صار معكم موقف متل هيك. وتعوا نحاول نعمل نفس الشي👍؟ يلا نجرّب. و خلّينا نشارك ولادنا بفعلها لتزيد الناس المذوقة بهالدنيا.

Leave a Reply

Your email address will not be published.