fbpx

لن أنكر

لن أنكر

طبيعة عمل زوجي تتطلب العمل لساعات طويلة ومناوبات مختلفة وحتى عطلة نهاية الأسبوع كانت غير ثابتة. باختصار إني متعودة على عدم وجوده معنا أنا و أولادي طول الوقت. ومع ذلك فإن غيابه عن البيت بالفترة اللي سافر فيها بسبب الانتقال لبلد جديد أتعبني.✈️

بعرف مالي أول وحدة ولا الوحيدة. بعرف انو في ناس عايشين سنين على هذا الوضع وصرت حاسة فيهم كتيير، بس يمكن لا يعني اني مافيني عبّر عن هالتعب

قضيت آخر شهرين بقطر بدون رامي, , نقلة و بيع أغراض, شهر منهم رمضان, وتخللها أمور ماكان يخطرلي أعملها… يمكن في شغلات مع صعوبتها حبيت إني جربتها لحتى “اندعك” أكتر.💪

▪️بس مافيني أنكر انها كانت فترة جدا صعبة علي…جسديّا كان متعب ونفسيا البعد عن رامي كان صعب, و المشاعر المتخبطة اللي كانت مزيج من الحزن لوداع أغلى الصديقات و البلد الي أسست حياتي فيها مع زوجي وولادي, ومزيج من الحماس للالتقاء برامي وبداية مشوار جديد.🙏

▪️ مافيني أنكر إني مرتين انفجرت بكاء قدام ولادي… مع إني ما بالعادة ببكي قدامهم… بس مرّت أيام طاقتي خلصت… تالية تساءلت ليش عم ابكي.. قلتلها تعبانة كتيير ونفسي بابا يساعدني.. قاتلي أنا بساعدك.. و تاني يوم أول مافاقت لبست لحالها وقاتلي أنا خلصت, قوليلي شو بدك ساعدك❤️

▪️ مافيني انكر اني بهالفترة حسيت حالي مخنوقة لأنو مافي غيري عم يتعامل مع الولاد, مافي حدا يشاركني بتوجيه أو حتى لعب وضحك معهم.. حدا يطلبوا منه بدل ما كلشي ماما بدي و ماما عطيني و ماما ماما ماما… بس بنفس الوقت مافي انكر انه هالقرب علّقني فيهم أكتر خلّى علاقتنا أقرب… و ساعدني أعرف كيف اضبطهم لحالي بدون مساعدة.


▪️ مافيني انكر انو بالهفترة ياسر اختلف كتيير.. بُعده عن أبوه أثر فيه وبمزاجه وشخصيته. شوقه اله كان واضح جدا وخصوصي بس يشوف عنصر رجولي يركض ويقعد بحضنه لحتى يعوّض … ياسر صار يبكي فورا و يبكي كتير و يزعل على كل شغلة…

▪️بس مافيني انكر انو البعد عن رامي كان اله شيء إيجابي غير الشوق اللي بقوّي الحب, بس شي أنا حسيته مهم.. شيء البعض يمكن مايوافقني عليه بس هو مو غلط… خلّاني حس إني بقدر اعتمد على حالي🙋‍♀️ وخفف تعلّقي الجنوني بزوجي… ما بعرف قديش لح انفهم صح, بس يمكن في ناس متلي, تعلّقها بزوجها, وشريك حياتها بخلّيها تحس انها ما بتقدر تعمل شي بدونه, و هاد شي كتير مضرّ…

▪️ بنفس الوقت مافيني ولن أنكر قديش قدّرت وجوده بحياتنا👨‍👩‍👧‍👦 والحمد لله. ومع قلّة الوقت اللي منقضيها معه، بس لو شفناه الصبح فقط وضميته بتعطيني الطاقة لكمّل فيها يومي. قدّرت أقل مساعدة كان يقدمها للولاد, أحيانا ما شوفه كل اليوم بس اطلب منه يحط أكلهم عالمدرسة بس يرجع, أو يشغل الجلاية, أو ينشر الغسيل… يمكن كنت لاقيها شغلة وحدة بس هلأ قدرتها.

بعد التعرّف على ناس جديدة، أدركت أن عدم الاستقرار والتنقّل وتشتت العيلة بحيث الزوج بمكان والأم مع ولادها بمكان، صارت للأسف قصة عم نسمعها كتير.

لذلك حبيت شارك مشاعري وإنو كلنا عم نمرّ بنفس الظروف. لمّا قابل حدا واسمع انو مرّ بنفس تجربتي حس في حدا فاهم عليّ وعرفان باللي مرّيت فيه.🤗

ا share لو كنتوا مريتوا بنفس الظروف و شاركوني مشاعركم وتجربتكم.

🤲الله يجمع شمل الجميع و يفرّج عن الكل يارب🤲

Leave a Reply

Your email address will not be published.