fbpx

لعب بدون ألعاب

لّما شحنّا أغراضنا وبقيوا الولاد بدون ألعاب، اكتشفت قديش الفرط بكثرة الألعاب للولاد مالها فائدة، لأنو لا بيلعبوا بألعابهم وبنفس الوقت وجود كتير ألعاب بخليهم يحتاروا بشو يلعبوا وبالأخير بيلعبوا فيهم ١٠ دقائق وبعدين بقولوا ملّينا


لمّا اضطروا يسلّوا حالهم بعدم وجود ألعاب، خيالهم صار واسع أكتر وصاروا يخترعوا تسلية من أي شيء موجود


وهاد الشي غير إنّي لامسته بالفعل، في دراسة نشرت من Infant Behavior & Development
https://www.sciencedirect.com/…/a…/abs/pii/S0163638317301613
بتأكد أن الولد بكون أكثر سعادة بوجود ألعاب أقل لقدرته على التركيز بلعب و خيارات أقل ويجعله يلعب أكثر إبداعا


لمّا وصلنا على تركيا وكمان ماكانوا موجودين ألعابهم، صار وقتنا أكثر باللعب بالحدائق والأماكن المفتوحة، اللي لحالها بتخلّي الولد يستمتع بالحريّة والركض وتجميع شغلات من الطبيعة واللعب فيها.


بنفس الوقت، ما بنكر أن لمّا وصلوا أغراضنا وفتحوا ألعابهم بقينا ٣ أيام مانطلع من البيت لأنو كانوا مشتاقين لألعابهم وفكّرت نظرية عدم وجود ألعاب غير صحيحة. بس كانت ٣ أيام فقط وبعدها رجعوا لنفس الفكرة اللي بتأكد النظرية.


أحسن شي الموازنة بين الاثنين وأنا كتير بحب فكرة تخبئة شوية ألعاب وإعطائهم بعد فترة لأن بينسوهم وكل مرّة بيرجعوا بيفتحهوهم كأنهم شي جديد.


يا ترى، منقدر نخفف وجود ألعاب كتير لولادنا؟ ولّا معظمنا منشعر بتقصير إذا ما اشترينالهم ألعاب كتير؟

بعض الأفكار اللي لعبوها أطفالي بعدم وجود ألعاب

مسارات و شوارع

1. مسارات وشوارع للسيارات
من شريط لصق ورقي، شكّلنا مسارات وطرق للسيارات
كتير انبسطوا فيها لأن الولد بحسّ بإنجاز لمّا هو يخلق لعبة من لا شيء على طريقته
حتى أنهم صار بدهم يعزموا رفقاتهم ليلعبوا معهم فيها


Floor is lava


2. الأرض نار (the floor is lava)
وضعوا كل ماوجدوه حولهم على الأرض. والفكرة تجنّب لمس الأرض التي هي (نار) والي بيلمس الأرض بيخسر


تعلم الرسم من اليوتيوب

3. تعلّم الرسم من اليوتيوب
تسلية لكل حدا فينا وكلنا منشعر بإنجاز كتير رهيب
بيختاروا الرسمة اللي حابينها وبعدين منلوّنها
أكثر قناة منحبها هية
ArtforKidsHub
https://www.youtube.com/user/ArtforKidsHub


فن من أغطية الماء

4. فن من أغطية الماء
جمّعنا أغطية الماء وتسليّنا بتلوينهم وتشكيل أحرف وأشكال


كرة من قصدير للعب


5. صنعنا كرة من القصدير ولعبنا فيها بالبيت


أكيد في كتير أشياء تانية والفنون والتلوين مالهم نهاية، شاركوني بالتعليقات بصور أو فيديوهات كيف بيتسلوا أولادكم أحيانا من غير ألعاب؟

Leave a Reply

Your email address will not be published.