fbpx

لا تسمحي لأي حدا ما يخليكي تعملي الشي اللي بتحبيه

لا تسمحي لأي حدا ما يخليكي تعملي الشي اللي بتحبيه

اليوم أنا وعم صللي عند الأولاد هنن و عم يناموا، تالية كانت عم تحاكي حالها وتلعب بدبدوبها🐻 وتنغّم ( هَيْ العادة كانت عندها من هية و بيبي، بتحاكي حالها لوقت ما تغفل)

بس ياسر كان عم يغفل ونعسان كتير😴 فما كان بدي تأزعجه.

فأنا و عم صللي قلت “الله أكبر” بصوت عالي😬. واللي قصدي (استغفر الله) “حاج تحكي🙈. قام هية فورا سكتت.

خلَصْت صلاتي وخطرلي قديش اللي أنا عملته فيه أنانية. ليش احرمها تعمل شي كرمال أخوها اللي عادي يتعوّد ينام على صوت🤷‍♀️و هية ماعم تتدخّل فيه!

رحتلها وقلتلها:

“أنا آسفة إنّي خلّيتك تسكتي، يمكن بس بدي توطّي صوتك. بس عادي احكي مع حالك”

وحكيتلها كيف هَي عادتْها من هية وبيبي. ضحكت كأي ولد بحب يعرف عن حاله هو و صغير وقلتلها:

“لا تسمحي لأي حدا ما يخليكي تعملي الشي اللي بتحبيه… مين ما كان، حتى لو أنا! طالما انك ماعم تعملي شي غلط، بتقوليلي ماما أنا ماعم ساوي غلط وساعتها متل هالموقف أنا بانتبه عالصح، وإذا كان غلط أنا بنبهك وبشرحلك.

بس دايما ضللي اتذكري إنك تبقي تعملي اللي انت بدك ياه!”
.

ما بعرف قديشها استوعبتْ من الكلام، بس كتير ضروري بناء هالفكر بعقلها و بعقول ولادنا. بدي ياها تكون واثقة من اللي بتساويه و مو خايفة من حدا💪. ما بدي يكون خوفها من الناس المحبطة وصدهم يمنعها من العمل أو الوصول لأشياء هية بدها ياها لو شو ما كانت (أكيد مرة تانية طالما مافي غلط).

هدول المواقف البسيطة اللي يا بتبني شخصية رياديّة، يا أمّا شخصية مدمّرة. والمشكلة اذا كانت من نتيجة تعاملنا أو أسلوبنا نحن الأهل معهم.

فيارب يقدّرنا دايمًا نكون حكيمين بالتربية ونقدر نبني جيل يوصلنا لأماكن أحسن.

بتمنالك يا تاليتي تكوني أقوى وأنجح وأسعد بنت بالدنيا🙏❤️

Leave a Reply

Your email address will not be published.