fbpx

قصتي مع العصبية

قصتي مع العصبية

تالية وياسر الغاليين،
يؤلمني كل ما عصب عليكم..كل ما تناموا وأندم اني انفعل على شي ماكان بيستاهل، وارجع تاني يوم أعمل نفس الشي ولا كأني تألّمت وتأمّلت إني كون رايقة تاني يوم
مع إنّي بحس حالي غلطانة أنا وعم عصّب، بس عرفانة ومالي قادرة وقّف، بالعكس بحس التعصيب عم يفشّلي قلبي بلحظتها.


هالمرّة أدركت أن الموضوع زاد وقررت افهم حالي، افهم ليش هيك عم ساوي بحالي وفيكم، وعمضيّع جانبي الأمومي الرايق

براءتكم وعتبكم عليّي هو الدافع الأساسي اللي خلّاني اقعد وفكر بيني وبين حالي ولاقي حلول لتغيّرني
بصراحة العامل الأساسي  إني مضغوطة من شغلات صايرة معي ولهيك مأثرة بشكل كبير على نفسيتي. ما لي قدرانة افصل وما خليها تعيق حياتي، بس ما ذنبكم، ومافي شي بالعالم بيستحق إني خرّب علاقتي فيكم بسببه


بس اليوم هيني قررت الجأ لمدرّبة حياة تساعدني وهي أول يوم وكتير ارتحت احكي وعبر عن اللي بقلبي وطلّع كلشي مدايقني ولح تساعدني بهالطريقة إنّي طلّع وافصل.


بتمنّي من قلبي اهدأ شوي شوي وما تعود العصبية صفة مطبوعة براسكم عني وتمحي كل الذكريات واللحظات الحلوة اللي بالمبقابل بعملها معكم.

بحبكم ٢٠١٦


رسالة من مذكراتي كتبتها بفترة مرقت كنت كتيير عصبية عالولاد.. هالموضوع جداً بدايقني بس لقيت إني احكي عنه لحتى فيد غيري..

وبحب زيد إني وقتها رحت عالمكتبة واستعرت كتب كتيرة عن الغضب وبعد قراءة بعض الصفحات من عدة كتب، شدني هالكتاب اللي Peaceful Parent, Happy Kids: How to Stop Yelling and Start Connecting كمان هو كان اله تأثير كبييييير بتغييري.

و من وقتها وصلت لهالنتيجة

//إني طبيعي عصب خلال النهار لأنه طاقة الأم أكيد تنفذ من المليون شغلة… بس مو طبيعي عصب بطريقة كتير منفعلة ما بتستاهل اللي صار.

// طبيعي عصب بطريقة منفعلة كل فترة وفترة… بس مو طبيعي يكون هالشي كل يوم..

//إني لو حطيت ببالي اني بدي إتغيير بالإصرار والوعي المستمر، لح اقدر اتغيّر.


أنا بعد ما قرأت الكتاب و ساعدني كتير، صرت كل فترة ارجع اقرأه لحتى اتذكر… لأنه جد الأم و أي إنسان بيحتاج يجدد طاقته ويتذكر انو ولادنا هم أطفال ما بيستاهلوا نعصب عليهم..


لح شارككم  النقاط الّلي استفدت منها قريباً..


أهم شي نعرف انو مالازم نكون مثاليين، كل اللي لازم نكونه هو واقعيين..

Leave a Reply

Your email address will not be published.