fbpx

تشكيل جملتنا بتغيّر مسار الموقف كله

تشكيل جملتنا بتغيّر مسار الموقف كله

 على قد ما اشتريت قناني مي (كاسات ماء)  للأولاد ماعاد أعرف كم وحدة صرت جايبة! كل الأشكال والألون.. الزهري والأزرق، اللي بتفتح من فوق ومن جنب واللي بالغطا و و و   

وكل مرة منشتري وحدة جديدة لسبب، شي عمتسرب شي ضاعت أو نسيناها بمطعم، شي صارت قديمة وهيك

بس هالمرة السبب كان غير والموقف خلاني فكر بشي كتير مهم

القصة انو مرة اخدت تالية وياسر يشتروا كاسات جديدة.  كل حدا اختار تبعه

 بس بعد كم يوم ياسر كسرغطا كاسته! طنشت كم يوم بس لحتى أقدر روح، بس ماعاد في جرثومة ما لقطتها الكاسة فحسيت صار لازم اشتريله وحدة جديدة

فرجعت عالبيت شارية كاسة لياسر بس طبعا ماجبت لتالية لأنه تبعها لساتا جديدة وحلوة وبتجنن

بس مستحيل الغيرة ما تطلع

تالية: ماما وأنا وين تبعي

أنا: حبيبتي ما جبتلك لأنو تبعك لسا جديدة بس ياسر كسر تبعه 

تالية: أوك أنا حاكسر تبعي

 أنا (مصدومة) : لا طبعا لا… ليييش؟ شوفي تبعك ما أحلاها، تبع ياسر أصلا بايخة بس زرقا تبعك عليها ميني ماوس

تالية (حطتهم قدام بعض) : بس شوفي تبعه أكبر من تبعي! بدي وحدة

لَمْلَمت الموضوع وأقنعتها لما تبعها بتنتزع بجبلها وحدة جديدة، بس هلأ لا تنزعيها لأنها كتير حلوة وما بصير نشتري شغلات ونحن عنا لأنو حرام

 طبعا هية ما كانت كتير سعيدة بهالخلاصة بس كمَّلِت يومها عادي

بسسسسس أنا و كأي أم بتزعل على زعل ولادها، ضل الموضوع ببالي و كنت محتارة بأمرين

 ١. هل هاد الشي مو عدل؟ يعني كيف بحكي لبنت صغيرة إنه أخوها المهمل اللي كسر كاسته طلعله وحدة جديدة وهيه اللي اهتمت بأغراضها طلعت بلا شي

٢. أو إنو لازم اغرس فيها قيمة الأشياء والمحافظة على أغراضها وعدم الإسراف

هالفكرتين ضلوا براسي طول الليل، بس بصراحة من جوا كنت بعرف إنو بطريقة ما،  بدي عوّضها وجبلها وحدة جديدة . بس شو المبرر حيكون؟

الحمد لله اليوم التاني كان عندها اختبار قبول بمدرسة جديدة فاغتنمت هالفرصة احكيلها بما انك ساويتي منيح وتجاوبتي مع المعلمة هي مكافأتك، وكنت حريصة انها تفهم السبب… وكتير انبسطِت وساوينا متل دايما، تقليد ماما الله يخليلي ياها ربتنا على هالفكرة، إنو اذا استحلينا نشتري شي عنا منه، بس حابين نجدد فلازم نتبرع بشي عنا ياه بالمقابل

المهم انو الدرس اللي أنا تعلمته من هالموقف اللي صار، قديش اختيارنا للكلام مهم جدااااااا جدااااا! ا تشكيل الجملة تبعنا هي اللي بتشكّل وبتغيّر مسار الموقف كله. جوابي لتالية  “ياسر كسر تبعه جبتله وحدة جديدة” هو اللي شعّل الغيرة وخلا ردها طبيعي مية بالمية

بعِلم النفْس، بيحكولك اذا سألتِ حدا فكري بأي حيوان إلا الفيل، فالعقل أول شي حيفكر فيه هو الفيل! هيك العقل مبرمج. اذا بدك تقولي لابنك ماما لا تبكي، حيبكي! أو لا تصرخ حيصرخ، العقل يُسقط النفي وبياخد الفعل

 “البديل انك تعطيه سبب عدم الصراخ لتشرحيله انه ما يصرخ. مثلا تقولي “ماما بيوجعك حلقك اذا صرخت، حاكيني بهدوء بقدر افهم عليك

الكلام فن، والتربية فن، وعنجد كل ما زاد عنا الوعي كيف نتعامل مع ولادنا بتسهَل علينا مواقف معينة، بعرف مو كلشي بهالبساطة،  بس لح ضل حاول ولح اغلط وبرجع بحاول واتعلم

Leave a Reply

Your email address will not be published.