fbpx

تحديّات أم عاملة

تحديّات أم عاملة

أي مكان الواحد بيشتغل فيه، بكون حريص يبرهن لمديره أو مكان عمله أنه ملتزم و عنده انتماء لعمله. قبل ما كون أم، كان هالموضوع بياخد وقت، بس الحمد لله ما كتير صعب، مع الاجتهاد والشغل الحلو، اللي بكون واثقة منه، بقدر حقق هالنتيجة. لمّا صرت أم، الأمور بدأت تصعب. و لمّا صار في ولدين زادت الصعوبة أكثر فأكثر

التزامي بوقت العمل، وشغلي خلال العمل الحمد لله استمر بنفس الكفاءة و أحسن مع اكتساب الخبرة. بس اللي فرق هوقدرتي على الانتماء لمكان عملي بعد ساعات العمل. لمّا يخلص وقت دوامي لازم اطلع بالدقيقة لأنو عندي ولدين بمدرستين مختلفتين روح جيبهم. مع العلم إنو التنين بحطهم ساعات إضافية أكتر من الدوام الطبيعي، و حدّي الأقصى نصف ساعة من وقت انتهاء دوامي أنا، السبب اللي بخلّيني مضطرّة فورا اطلع لحتى الحق جيبهم هنن التنين

اضطراري للغياب عن العمل بسبب مرضهم كمان كان يزيد من هذا التحدي

أحيانا ممكن يكون مكان العمل متفهم لوضع أي أم وأن هذه الأمور ببساطة جدا شي طبيعي بس عالأغلب لمّا يحتاج العمل وجود هي الأم الموظفة وما تقدر تتواجد، بتزيد الضغوطات

فالتحدي على الأم العاملة جدا كبير انها باستمرار بحاجة تبرهن ان بغض النظر عن العوائق العائلية هية بتقدر تكون موظفة ناجحة ومعطاءة. وبنفس الوقت توازن و ما تقصّر على أولادها واحتياجاتهم. و اذا مافي ناس تقدّر فكوني انتِ من يقدّر نفسك💪. وطالما انت مؤمنة بأن اللي عم تعطيه بشغلك هو افضل ما لديك و في قمة الانتماء فالله ما حيضيعلك تعب

كل فترة بفكر بالحوافز اللي خلتني اختار كون أم عاملة لحتى اجتاز هي التحديّات. وهيَ نظرة أولادي الي كأم لها هدف و بتسعى جاهدة لتحقيق اللي بدها ياه. وكيف بقدر وفّق بين عيلتي وحبّي لشغلي وطموحي وكون إمرأة مستقلّة وفخورة بنفسها وقادرة تشارك زوجها عقلية مماثلة لأفكاره.

👩‍💻شاركينا ما هو التحدّي اللي انتِ تواجهيه كأم عاملة

Leave a Reply

Your email address will not be published.