fbpx

التفكير الزائد

التفكير الزائد واختلاف بين عقل الرجل وعقل المرأة

حتى و أنا فوق و المنظر رائع و رواق كان بالي مشغول على ياسر اذا عم يبكي أو خايف. لأنو هو و تالية كانوا مع أصحابنا بالقارب اللي انطلقنا منه و كان خايف من القارب وقت طلعنا عليه

🚀☁️☁️فكنت عم قول يا ترى عم يبكي؟ هل خاف أكتر لما شافني فجأة صرت بالسما!

أحيانا بحس حالي مملة على قد ما بفكر بولادي وقت بكون عم اعمل شي لنفسي… و اذا بالسنة مرة سنحت الفرصة نطلع أنا و رامي مشوار بدون الولاد كمان كل تفكيري بكون فيهم

 بس بعد ما سمعت نظريّة الخبير بالعلاقات الزوجية مارك غنغور عن اختلاف عقل الرجل و المرأة تبيّن لي إني الحمد لله طبيعية

بيحكيلك أن عقل الرجل مكون من خانات… كل شيء بحياته له خانة.. المال، العمل، الأولاد، الزوجة و خانة فارغة.. يعني عنده المقدرة على التفكير بلا شيء… على عكس المرأة اللي بيتكوّن عقلها من شبكة مترابطة بحيث أنها تربط كلشي بكلشي.. الأولاد بالعمل، الزوج بالأكل، البيت بالأولاد و هكذا… وليس باستطاعتها إمضاء وقت لا تفكر فيه بأي شيء

ولكن هاد الشي لا يبرر أن احيانا منيح للولاد و ضروري النا كأهل أو أمهات انو نبعد شوي عن ولادنا. تعلقنا و تواجدنا الزايد معهم أوقات ما بكون لصالحهم… أمّا وقت نتركهم منكون عم نفيدهم بحياتهم لما نخلّيهم يحاولوا يتأقلموا لأجواء غير الأجواء اللي نحن منوفّرلهم ياها ونجعلهم يتعوّدوا على ناس غيرنا

فعودة للنظرية، طبيعي يكون عقلنا عم يفكر فيهم لما نعمل شي بدونهم بس نحاول اذا اجتنا أفكار متل “ليش هيك ساوينا، و مع مين تركناهم…” هدول افكار لا فائدة لها بالوقت اللي منكون خلص طلعنا. احسن شي نثق بالقرار اللي اتخذناه وقت اللي اصلا فكرنا مع مين نتركهم او السبب اللي خلانا نتركهم

هل بتحسي انتِ كمان تنطبق عليكي هالنظرية؟

عل فكرة، السبب الوحيد ما حبيتها لأنو هلأ كل مرة بقللو لرامي مشتهية سافر لحالي بدون الأولاد لحتى روّق، بقللي: “ما فيكي، ماحتروقي..حضللي عمتفكري فيهم.. فأنا اللي حسافر🤨..”

هون بقللو لا حبيبي خليني سافر و لح اثبتلك عكس هالنظرية

Leave a Reply

Your email address will not be published.