fbpx

… أوقات أنا اللي بكون بحاجة لحنانهم، وإني إستمدّ طاقتي منهم…

… أوقات أنا اللي بكون بحاجة لحنانهم، وإني إستمدّ طاقتي منهم…

كان يوم مُتعب كتير. أخدت ولادي بعد المدرسة لموعد دكتور لتالية آخدته من شهرين. فالموعد كان جدا مهم. توقعت ساعة وحنرجع عالبيت فأخدتلهم أكلات خفيفة ياكلوها لحد ما نقدر نرجع نتغدى.

!😩نص ساعة، ساعة.. ساعة و شوي ونحن لسا مننتظر⏳ما فتنا عالموعد إلا لبعد ساعتين ونص😤! مابعرف وين ممكن خيالكم الواسع يفكر شو صار بهالوقت، بس وين ما أخدكم فهو صح

مع ولدين صغار مافي شي يعملوه غير يستنوا بعيادة دكتور، جوعانين كتير، تعبانين(وتحديدًا ياسر دايما راجع نعسان لأنو ماعم ينام بالمدرسة)، وطبعا مالّين

ياسر أبدع بكل معنى الكلمة، وأنا ما بلومه أبدا وتركته يعمل اللي بدو ياه لأنو اللوم عالمركز اللي أخّرنا لهالدرجة🤷‍♀️. وأنا كنت تعبانة من الصبح، فطاقتي كنت عم استمدها من تالية. عنجد أوقات أنا اللي بكون بحاجة لحنانهم، لإستَمد طاقة منهم. خلّيت تالية بحضني وكل شوي بوسها لحتى روّق حالي

آخر شي، خلّونا ندخل على غرفة التشخيص، اللي كمان أول شي عبارة عن مرحلة انتظار تانية😏، وياسر بدأ إبداع جديد بغرفة الدكتور، واللّي هون عبارة عن أدوات وأوراق وصار يفتح برّاد فيه أدوية وإبر🤦‍♀️. أنا هون كان شحني خلص..صبري نفد..على آخر شي الوحدة بتحس كل الصبر بهالساعتين تلاتة لح ينفجر بالأخير🤯. أخدت ياسر وبنبرة تعصيب وتعب قلتله “الله يخليك اهدأ بس ٥ دقايق، خلص حنروح والله بعرف تعبنا

💞تالية اطّلّعت عليّ وقالت لي “ماما اعملي هيك” (عم تشرحلي آخد نفس عميق مشان روّق)..اطلّعت عليها وعنجد حسيتها هية الواعية بهالموقف
بالليل أنا وعم نيّمها، ذَكَرتْ الموقف، قلتلها شكرا كتير اليوم ذكرتيني لمّا عصّب أعمل هيك (آخد نفس)، مين هيك علّمك، بعرف أنا بس بحب اسمعها

قاتلي انت. و بابا بقللي لمّا تعصبي فكري بشي تاني حلو
(قلتلها كتير حلو. هي طريقتي وهي طريقة بابا. طيب انت شو طريقتك؟ قاتلي أنا بعِدْ لل ٢٠ و بعدين بعمل هيك (باخد نفس عميق

قديش كنت سعيدة أن اللي منعلّمها ياه ممكن ما دايمًا نلاقيها عم اطبقه، بس هو مزروع براسها وبيطلع بمواقف معيّنة. والأحلى من هيك، عجبني كيف هية قدرت تفكر بطريقة مختلفة تجمع فكرتنا بفكرة جديدة لقتها حلّ مناسب الها.

تذكرة النا نحن: أحيانا بتمرق علينا أيام متعبة كتير منشعر ان مافينا انطبق اللي عم نعلّمه لولادنا..كتير طبيعي وعادي ولادنا يشوفوا ان الحياة متقلّبة وفيها أيام صعبة. بس لمّا نتذكر ان بالمقابل أي شي صغير، أي كلمة بسيطة أو توجيه عابر منحكيه لولادنا بيبقى مرسّخ بعقلهم،بيعطينا دفعة جديدة… خلّينا أكيدين كل المجهود وكل اللي منزرعه هنن وصغار، بيجي يوم بيطلع بإذن الله

Leave a Reply

Your email address will not be published.